sadagi par us ki mar jane ki hasrat dil main hai
bas nahin chalta k phir khanjar kaf-e-qatil main hai
dekhna taqrir ki lazzat ki jo usne kaha
main ne yah jana k goya yah bhi mere dil main hai
garche hai kis kis burai se wale ba in hama
zikr mera mujh se behtar hai k us mahfil main hai
bas hujum-e-na umidi khak main mil jayagi
yah jo ik lazzat hamari sai-e-behasil main hai
ranj-e-rah kyon khenchiye wamandagi ko ishq hai
uth nahin sakta hamara jo qadam manzil main hai
jalwa zar-e-atash-e-dozakh hamara dil sahi
fitna-e-shor-e-qayamat kis ki ab-o-gil main hai
hai dil-e-shorida-e-Galib tilism-e-pech-o-tab
raham kar apni tamanna par k kis mushkil main hai
No comments:
Post a Comment